MitrovicaPress

Shkruan: Genc POLLO
Me ceremoninë e organizuar sot nga MASH, ne dëshirojmë të shënojmë realizimin e suksesshëm të një nisme shumë të rëndësishme në arsim, atë të Maturës Shtetërore.

Kjo nismë u lind pas skandaleve të vjeshtës 2005 në pranimet në shkollat e larta, u orientua nga nevojat e hershme e të shumëllojshme të mbetura të papërmbushura në arsimin e mesëm dhe u mbështet në modelet e arrira evropiane të përshtatura për rrethanat tona.

Por le ta kundrojmë këtë institucion të ri në një plan më të gjerë, në atë të përpjekjes së Qeverisë për të kthyer besimin e publikut në instancat shtetërore, si organe që veprojnë në bazë të ligjit e me drejtësi.

Në kryqëzatën shumë-frontëshe të Qeverisë kundër korrupsionit, këtij gërryesi të institucioneve publike dhe i besimit në to, ka arritje e suksese të ndryshme. Por diçka duhet vërejtur që në fillim: nëse korrupsioni ndodh, bie fjala në dogana, atëherë dëmi për shtetin e shoqërinë, është në radhë të parë financiar. Nëse ndodh në arsim, dëmi është në radhë të parë, moral dhe injektohet tek brezi i të rinjve. Kur një maturant bëhet student, pastaj diplomant si jurist a mësues përmes hileve, nuk duhet të presim që në punën e prokurorit, të gjykatësit apo në atë të edukatorit, ai t’i përmbahet etikës së domosdoshme të profesionit. Matura Shtetërore realizoi pikërisht këtë: evitoi parimisht e praktikisht çdo mundësi të korruptimit të rezultatit individual, në këtë pjesë delikate, ku puqet arsimi i mesëm dhe ai i lartë. Me maturën u ngrit një sistem i shëndoshë e i bazuar në parimet morale bazë të shoqërisë; një sistem që orientohet nga merita individuale, që e mbron dhe e nxit atë.

Kemi pasur plot raste ku fëmijët e prindërve me influencë, pasi janë të kamur apo me ofiqe, disa prej tyre të njohur të mi, janë vlerësuar nga matura 1-2 nota më poshtë se vlerësimi shkollor. Siç ka patur edhe disa raste që nxënës nga familje të thjeshta të vlerësohen 2-3 nota më lartë se shkolla, kjo e arritur pa kopjim. Krahas nxjerrjes në pah të problemit të diferencimit të padrejtë në shkollat tona, matura gjithashtu vendos qartë drejtësinë sociale.

Në planin arsimor, ne kemi instaluar një hallkë, e cila nxënësin dhe mësuesin e shkollës së mesme që nga viti i parë, i vë realisht në nxitje për të punuar, duke ju larguar notave fiktive. Këto të fundit mbeten të pavlera përballë kutit objektiv e neutral të maturës. Gjithashtu me një notë të standartizuar në rang Republike dhe me 30.000 maturantë të vlerësuar me të, ne kemi siguruar një bankë të dhënash të mrekullueshme për çdo prefekturë e për çdo shkollë. Mbi këtë bazë, politikat e ndërhyrjet tona nuk do të bëhen qorrazi apo toptan, por do të kalibrohen. Pra, kalojmë nga përdorimi i çomanges tek ai i bisturisë.

Praktikat funksionuese të maturës, vitin e ardhshëm pas një studimi do të shtrihen edhe në provimet e lirimit të shkollës bazë dhe në ato universitare.

Gjithashtu, modeli i notave te shkallëzuara apo me dy shifra pas presjes dhjetore, që u përdor në maturë, do të hapë një debat mbi rishikimin e sistemit aktual.

Edhe për temën e nxehtë të pranimit në universitete këtë vjeshtë, krahas sistemit klasik të monitoruar fort, po punojmë për SIPO-n, një sistem online ku çdo kandidat verifikon në internet pozicionin e tij në renditjen për një degë në fakultet.

Projekti ynë i Maturës Shtetërore hasi që në fillim në skeptikë e kritikë. Do t’i ndaja ata në dy kategori: të parët, ndonëse e përkrahnin në parim këtë lloj provimi, druheshin se koha e mbetur ishte e paktë. Vërejtjet e tyre vlejtën, sepse na bënë të punojmë më shumë se 24 orë në ditë. Kategoria tjetër, është e atyre që do të humbisnin lopën që milnin përvit, xhepat e prindërve të maturantëve e studentëve. Me këta të fundit do të vazhdojmë të merremi.

Matura dëshmoi se kur vullneti i fortë i shtetit është i pranishëm, realizohen ato çka duken si të pamundura. Provimet e kësaj vere dëshmuan se janë kapacitetet administrative për të realizuar një operacion që ndër ata që shtrihen në katërkëndëshin Koplik -Kukës- Kolonjë- Konispol, është ndër më të sofistikuarit. Për më tepër, gjithçka u krye me një sens organizimi, disipline, rregulli e korrektese që më bind mua dhe të tjerë, se mësuesit janë prusianet e shqiptarëve.

Natyrisht që pati dhe probleme e vështirësi, që u korrigjuan në proces e sipër dhe ka gjëra që do të përmirësohen në vitet e ardhshme.

Matura Shtetërore 2006, është padyshim një sukses i rëndësishëm i Qeverisë, një arritje madhore e arsimit dhe një zhvillim model për shoqërinë. Për kontributin e tyre unë do të falenderoja përzemërsisht anëtarët e grupit që konceptuan maturën në muajt nëntor-dhjetor 2005; Komitetin e Maturës Shtetërore për këshillën e kujdesin;

Drejtuesit universitarë për mbështetjen e kësaj nisme; shefat e drejtorive dhe zyrave arsimore në rrethe dhe bashkëpunëtorët e tyre për punën e madhe dhe të përkushtuar; Drejtoritë e Kurrikulës, Inspektimit e Teknologjisë e Informacionit në ministri për angazhimin e tyre, kabinetin tim për mbështetjen në punë dhe informimin sistematik të publikut.

Personelin e Qendrës Kombëtare Arsimore të Vlerësimit të Provimeve që tre herë tok me Përzgjedhësit e Testit Përfundimtar (PTP) u fut në izolim me sens të lartë detyre e përgjegjësie.

Do të falenderoja veçanërisht zv/ministren Gjonaj për punën me universitetet dhe për sistemin e pranimit në to; të deleguarin e kryeministrit, Bardhi Musain, për kontributin e veçantë në periudhën kritike të provimeve;

Zotin Stavri Llambiri, për kontributin e veçantë gjatë gjithë kësaj periudhe nga nëntori deri sot si dhe zv/ministrin Halit Shamata, për punën këmbëngulëse në realizimin në çdo hap të këtij procesi të vështirë.

Një falenderim për ministrin e Brendshëm, Sokol Olldashi, Policinë e Shtetit, të cilët me sigurinë që ofruan, ishin kyç në mbarëvajtjen e provimeve.

Dhe së fundmi, “last but not least” një falenderim për kryeministrin Sali Berisha, i cili e përkrahu hapur nismën e Maturës që në fillim të debatit publik për këtë temë në janar të këtij viti, që zyrtarizoi këtë përkrahje një muaj më vonë përmes një Vendimi të Këshillit të Ministrave dhe që mbeti tërë kohën i interesuar e nxitës për ecurinë e saj. Dhe në mënyrë të veçantë në fazën delikate të dy muajve të fundit kur ai u angazhua personalisht, që gjithçka të shkonte mbarë.

Krahas maturës, ne po përmbyllim edhe reformën e liberalizimit te teksteve shkollore dhe ajo që vërejmë, është që tekstet sivjet, për të njëjtin çmim, janë shumë më cilësorë; kjo në sajë të garës e çlirimit të potencialeve të ndrydhura deri tani.

Është koha për të vijuar me hapa të shpejtë me reformën e kurrikulës, të trajnimit, të autonomisë shkollore; për të realizuar TIK-shkollat kudo në vend, sepse pa kompjuter e internet ne jemi vetëm virtualisht në shekullin 21, si dhe të realizojmë Masterplanin e shumëpritur në arsimin e lartë.
redaksia@mitrovicapress.net